إغلاق
إغلاق
وعِد يا عَداد - بقلم: رندة بحوث شمشوم.حيفا
السبت   تاريخ الخبر :2017-10-14    ساعة النشر :08:23:00

خَلصنا جيل الخمسين والستين إستقبلنا
راحَت منا أحلى سنين منها كتير تعَلَمنا
فَكرنا حالنا بعدنا صغار وبالعمر ما تقدمنا
بِفاجئنا ورق الخريف تيذكرنا وين صُرنا
صُرنا ننسي من ساعه .. شو عمِلنا ..وشو سمِعنا
ما عُدنا نشوف منيح ولا السَمع مساعِدنا
سُكر وضَغط ودهنيات والأدويه زوادِتنا
بنخاف نِطَلع بالمرايه حتى ما نشوف شو كبِرنا
وجوهنا خطوط وتجاعيد بالشيخوخه بتذكِرنا
ما بِنفَعنا عمليات تَجميل ولا مكياج يجَمِلنا
زَرعنا أسنان جداد تنقدر نوكل ونتهنى بلُقمتنا
كُنا نمشي ونتمَختر .. والكل يتغَزل فينا
بها الجيل بنمشي وندِب بِلزمنا عُكاز يمَشينا
ما عاد يهمنا ثياب جداد ولا كعب عالي يطَوِلنا
إشترينا حذاء أورتوبيد يمكن من الوجع يرَيِحنا
َصبغنا كل الشيبات ما بِدنا نُشعر إنو خَتيَرنا
بنِضحك عحالنا بِصَبغ الشيب عُمر الشيب ما راح يصَغِرنا
من النوم بالليل مَحرومين الوجع والأنين مسَهِرنا
أصبَحنا كتير حساسين وكل شيء من حولنا بيزعجنا
ما بنتحَمل مزحه صغيره وكل كلمه بتضايقنا
لما بنِتذكر أيام الصبا بتضحك شفه وبتدمع عينينا
بنعيد ذكرياتنا الحلوه وبالحسره بنمسح دمعتنا
طَب علينا خريف العمر بتشرين يبكينا ..ويوجِعنا َ
بتيجي غيمه سودا من بعيد بتوعينا وبتفَهِمنا
إنو جيل الستين مش هَنا وفَرح متل ما حلِمنا
ما بَنعرِف بعد عشر سنين شو يلي ناطِرنا
يلا نعمل شو بنحب ونفرح وننسى كل شي متَعبنا
أحسن ما يطُل السبعين ونندم عل شو ما عملنا
خايف تطير الأيام ويطير الهنا ويطَيرنا
وننتَسى على حوض الياسمين م يعود حدا يعرِفنا
يمكن نوصل للسبعين ونقرأ شو كَتبنا وسَجلنا
معقول نكون خرفانين وننسى كل شي صاد فنا
ولما نوصل للثمانين بنطلب من ربنا ياخُدنا ويريحنا
خلينا اليوم مبسوطين ونشكر ألله إنو لهالعمر وصِلنا
بقلم :رنده بحوث شمشوم




تعليقات الزوار

إقرأ أيضاً